முதன்மை உள்ளடக்கத்திற்குச் செல்

றெக்கைகட்டி பறக்கும் நகரம் பற்றிய நத்தையின் புகார் - ஆதவன் தீட்சண்யா


1.
ஒளியுமிழும் இந்த நகரத்தின் பாதைகள் எனக்குத் தோதானவையல்ல
இவை கண்களின் பாவைகளில் செயற்கையான பிரகாசத்தை அப்பி
என் சொந்தநிறத்தை மங்கச்செய்கின்றன

நடக்கும்போது என் கால்களை இடறச்செய்து வீழ்த்துகின்றன
பாயும் வாகனங்களின் வெளிச்சத்தை உள்வாங்கவியலாமல்
கூசும் கண்களை இடுக்கியபடி பேதலித்து நின்றுவிடுகிறேன்
நட்டநடுரோட்டில்

பாதையும் வெளிச்சமும் இணைந்தே இருப்பவை
வெளிச்சத்தால் பாதைகள் துலக்கம் பெறுகின்றன
துலக்கம்பெற்ற பாதைகள் கண்ணாடிகளாகி
தன்னில் கடப்போரின் பிம்பங்களை  காமிராபோல சிறைபிடிப்பதால்
முகவரி தேடி விசாரித்தலையும் ஒரு புதியவனை
அந்நியனென்று சந்தேகித்து சுட்டுத்தள்ளுகிறது என்கவுண்டரில்
பிணவறைகளில் கேட்பாரற்று கிடப்பவற்றில் ஒன்றிரண்டு
உங்கள் கிராமத்திலிருந்து உங்களைத்தேடி வந்தவருடையதாயிருக்கலாம்

வெளிச்சமற்ற பாதையென்று எதுவுமேயில்லை
உண்மையில் வெளிச்சமே பாதையாய் வியாபித்திருக்கிறது
விரித்துவைக்கப்பட்ட வலையைப்போல் நகரமெங்கும்

நகரமென்ற பெரும்பாம்பின் கண்ணென மினுங்கும்
பாதரச, சோடிய விளக்குகளிலிருந்து பெருகும் வெளிச்சம்
வழிகாட்டுதலின்பாற்பட்டதல்ல
அது, நிர்ணயிக்கப்பட்ட சுற்றுவட்டப்பாதைக்குள் மட்டுமே
என் நடமாட்டத்தை கட்டுப்படுத்தும் சட்டம் ஒழுங்கின் ஒருபகுதி
வசக்கி என்னை தொழுவில் கட்டும் சவுக்கின் நீட்சி

நம்பிக்கையின்மையின் குறியீடான இவ்வெளிச்சம்
வெட்டவெளிகளில் சுவர்களை எழுப்புகிறது
சுவர்களை மதில்களாக்கி அதன் விளிம்பில் உடைந்த சீசாத்துண்டுகளை பதிக்கிறது
பின்னும் எச்சரிக்கையுணர்வில் மின்வேலியிட்டுக்கொண்டு
நாலாபக்கமும் சுழன்றொளிர்வதன் மூலம்
இந்த நகரத்தையே திறந்தவெளி சிறைச்சாலையாக்கிவிடுவதால்
இங்கு
ஒவ்வொரு விளக்குக்கம்பமும் ஒரு காவல்கோபுரமாகி   
வேவுக்காரனைப்போல கண்காணிக்கிறது எவரொருவரையும்

இடுப்புநாடாவை வாள்முனையில் உருவி
என் மதத்தைத் தேடும் ஒரு வெறியனைப்போல
மேலிருந்து படர்ந்து துரத்தும் இந்த வெளிச்சம்
கள்ளச்சாவியிட்டு திறக்கப் பார்க்கிறது ரகசியங்களின் பேழைகளை
என் அந்தரங்கத்தை 
அரசாங்கக்கோப்புக்குள் துல்லியப்படுத்தும் பொருட்டு
அத்துமீறி நுழைகிறது கழிப்பறைக்குள்ளும் படுக்கையறையிலும்

2.
விளக்கும் வெளிச்சமுமில்லாத இடத்தில் மட்டும்தான்
இருளையே பச்சையமாய் உட்செரித்து
மீறல்களுக்கான தைரியம் வளர முடிகிறது
வளரும் தைரியம் கோடுகளை அழிக்கிறது
தவிர
மனிதனை மனிதன் என்பதற்காகவே தீண்டவும் தூண்டுகிறது.

கருத்துகள்

  1. வெளிச்சம் ஒவ்வொரு வரியும் எங்கள் அறிவுக்கு வெளிசமாக நன்றி தோழரே

    பதிலளிநீக்கு

கருத்துரையிடுக

இந்த வலைப்பதிவில் உள்ள பிரபலமான இடுகைகள்

சாஸ்திரம் சடங்கு சம்பிரதாயம் - ஆதவன் தீட்சண்யா

‘‘....ஒரு இந்துவின் வாழ்வின் ஒவ்வொரு கணத்தையும் மதம் கட்டுப்படுத்துகிறது. வாழ்வில் அவன் எவ்வாறு நடந்துகொள்ள வேண்டுமென்றும், செத்த பின்பு அவனது உடல் எவ்வாற கழித்துக் கட்டப்பட வேண்டுமென்றும் அவனுக்கு ஆணையிடுகிறது. சிற்றின்ப வேட்கையில் அவன் எப்படி எப்பொழுது ஈடுபட வேண்டுமென்பதையும் அது அவனுக்குக் கூறுகிறது. ஒரு குழந்தை பிறந்தவுடன் என்னென்ன சடங்குகள் செய்ய வேண்டும், குழந்தைக்கு எப்படிப் பெயரிட வேண்டும், அதன் தலையிலுள்ள முடியை எவ்வாறு சுத்திகரிக்க வேண்டும், அதற்கு முதல் ஆகாரம் எப்படிக் கொடுக்க வேண்டும் என்பனவற்றை மதம் அவனுக்கு எடுத்துரைக்கிறது. அவன் எந்தத்தொழிலில் ஈடுபட வேண்டும், எந்தப்பெண்ணை திருமணம் செய்துகொள்ள வேண்டும் என்பதையும் அது கூறுகிறது. யாருடன் உணவருந்துவது, என்ன உணவை உட்கொள்வது, எந்தெந்த காய்கள் அனுமதிக்கப்பட்டவை, எவை தவிர்க்கப்பட வேண்டியவை என்பதையும் ஒரு நாளை அவன் எவ்வாறு கழிக்க வேண்டும், எத்தனை முறை உணவருந்துவது, எத்தனை முறை தொழுவது என்பதையும் அவனுக்கு உரைக்கிறது. மதம் தழுவாத அல்லது அதனால் ஆணையிடப்படாத எந்தவொரு செயலும் இந்துவின் வாழ்வில் கிடையாது....’’ அண்ணல் அம்பேத்கரின் இவ்வ…

ஜெயமோகன், உங்களைப் போன்றவர்கள் என் பிணத்தைக்கூடப் பார்க்கக்கூடாது- விடியல் சிவா

ஜெயமோகன்,
தோழர்கள் எஸ்.வி.ராஜதுரை, வ.கீதா ஆகியோரால் எழுதப்பட்டதும்  விடியல் பதிப்பகத்தால் வெளியிடப்பட்டதுமான ‘பெரியார்:சுயமரியாதை' நூல் -முன்விலைத் திட்டத்தின் மூலம் விற்பனை செய்யப்பட்ட நூல், அன்னிய   நிதி உதவியைக் கொண்டு தயாரிக்கப்பட்டது என்று நீங்கள் உங்கள் வலைத்தளத்தில் எழுதிய அபாண்டமான பொய்க்கு வருத்தம் தெரிவித்திருக்கிறீர்கள். ஆனால்  “நான் சொன்ன கருத்து நூலாசிரியர்களைப் பற்றியது மட்டுமே தவிர பதிப்பகம் பற்றியது அல்ல” என்று கூறியுள்ளீர்கள். எனது நேர்மையை நீங்கள் சந்தேகிக்கவில்லை என்பதையும் ஒப்புக் கொண்டிருக்கிறீர்கள். மிக்க மகிழ்ச்சி.
“பெரியார்;சுயமரியாதை சமதர்மம்' பற்றிய அந்தக்கருத்து ஒரு பிழையான நினைவில் இருந்து எழுதப்பட்டது” என்று கூறுகிறீர்கள். உங்களது 'பிழையான நினவு'க்கு ஆயுள் எவ்வளவு என்று அறிந்து கொள்ள விரும்புகிறேன். ஏனெனில் இந்தக் கருத்தை கடந்த ஒருவார காலமாக தோழர் எஸ்.வி.ராஜதுரைக்கும் உங்களுக்கும் நடந்து வரும் விவாதங்களூடாக மட்டும்  நீங்கள் வைக்கவில்லை என்பதையும் நீண்டகாலமாகவே இந்தக் கருத்தைச் சொல்லி வருகிறீர்கள் என்பதையும் நீங்களே ஒப்புக் கொண்டிருக்கிறீர்கள…

வேளைக்கொரு வானூர்தியில் பிரதமர் பறந்துகொண்டிருக்க, சாமானியர்களுக்கோ அமரர் ஊர்தி கூட இல்லை - ஆதவன் தீட்சண்யா