நெருப்புக்கு அலையும் அரக்குமாளிகை - ஆதவன் தீட்சண்யா

மரணத்தின் கடவுள்
இப்போது தன் தூதுவர்களை
எல்லாவிடங்களுக்கும் அனுப்பியிருக்கிறபடியால்
அவர்களிடமிருந்து நேரடியாகவே வாங்கிட முடியும்
கலப்படமற்ற உன் மரணத்தை

அதுவொன்றும் கள்ளமார்க்கெட் லாகிரி வஸ்துவோ
கையூட்டு கொடுத்துப் பெறும் லைசன்ஸோ அல்ல
ரகஸ்யமாய்
விடலைப்பையனுக்கும் கிடைக்கும் ஆணுறைபோல்
ISO, ISI  முத்திரைகளுடன்
எல்லாப் பெட்டிக்கடைகளிலும்
பரந்து நீளும் தங்கநாற்கர நெடுஞ்சாலையிலும்
கலாசாலைகள் மற்றும் மருத்துவமனைகளிலும்கூட
ஷாம்பு அல்லது முகப்பூச்சு க்ரீம்போல சாஷேக்களில்
கோக் பெப்சி பாட்டில் வடிவில்
அலுமினிய foil சுற்றி பதப்படுத்திய உணவுப்பொட்டலம்போல்
நீ விரும்பும் எவ்வண்ணத்திலும் வாசத்திலும்
தட்டுப்பாடின்றி கிடைப்பதாயிருக்கிறது மரணம்

கிரெடிட் கார்டு அல்லது 0% வட்டிக்கடனில்
வலியறியாது சாகும் இந்நல்வாய்ப்பை பயன்படுத்தாமல்
தாமதிக்கும் கணங்கள் தற்கொலைக்கு ஒப்பானவை
 ஓடு ஏதேனுமொரு அங்காடிக்கு
வழியில் என்கவுண்ட்டர் நடக்காதவரை
நேர்த்தியாக உறையிடப்பட்டு
ஊதாநிற ரிப்பனில் பூங்கொத்துடனிருக்கும்
உனக்கு பாக்கியமுடையதாகிய  இயல்பானதொரு மரணம்.