முதன்மை உள்ளடக்கத்திற்குச் செல்

குலைவதற்கு முன்னான பொறுமையின் தன்னறிக்கை -ஆதவன் தீட்சண்யா

த்தனைக்குப் பிறகும் பொறுமையாகவே இருக்கிறேன்
வெட்டுறுகையிலும் நிழலீந்தும் மரமாக
விற்கப்பட்ட பின்னும் குளிர்ந்தோடுமொரு நதியாக

அதிகாரத்தின் மாடத்திலிருந்து நீங்கள் ரசிக்க
அடிமைகள் எமக்குள் செத்துமோதிய துர்ப்பொழுதுகளில்
அல்லது
பூர்வ குடியழித்து புதுசாம்ராஜ்யங்களை நிறுவுகையில்
ஏன்
பாமியான் சிலைகளை தகர்த்தபோதோ
பாபர்மசூதி நினைவையும்
பாதாளம் தோண்டி புதைக்கும்போதோ
அலைக்கழிப்பின் உக்கிரம் இறுகி
நான் பொறுமையாகியிருக்கக் கூடுமாதலால்
அது தற்செயலானதல்ல:
கால இட உருவெளி கடந்து பரந்தது

அடிஉதைக்குப் பழகிய என் அம்மா போல
அவமானங்களால் கறுத்த ஆப்பிரிக்கன் போல
அணுகுண்டால் பிளந்தாலும் அருள் மறுக்காத பொக்ரான் பூமியாக
நானும் அமைதியாயிருப்பதாலேயே
வாலிகுஜராத்தி தர்காவை நிரவித்தள்ளியவாறே
முன்பு உடைக்கமுடிந்தது உங்களால்
லெனின் சிலையை

அபயமற்று ஓடிய என் நிர்வாணத்தை
திரையிட்டு மகிழ்ந்தீர் மீரட் வீதிகளில்
மாய்த்தீர் எனதுயிரை உடன்கட்டையேற்றி
பகலில் வெளிவராமல் பதுங்கிவாழப் பணித்ததோடு
சாதி மேன்மையைக் கொண்டாட
மலத்தை வாயில் திணித்தப் பின்னும்
திறந்தேயிருக்கும் கைபர் போலன் கணவாயில் திரும்பியோடுமாறு
உங்களை துரத்தியடிக்காமலிருப்பதும்
என் பொறுமையின் கொடையால்தான்

எல்லாவகையிலும்
ஒரு மனிதப்பிறவியாய் வாழத் துடிக்குமென் பெருங்கனவை
சிறைபிடித்தீர் பயங்கரவாத தடுப்புச்சட்டங்களால்
பேனட்டால் கிழித்தீர் என் பிறப்புறுப்பை
அவலத்தின் பேருருவான நானோ
பொறுமையாகவே இருக்கிறேன்
தாமிரபரணி மணலுக்குள் சொருகியிருக்கும்
தேயிலைக்காட்டு தொழிலாளியின் ஆவிபோல
முத்தங்காவின் நிசப்தத்தில் உறைந்திருக்கும்
ஆதிவாசியின் ஓலமாக

ஆனால்
ஈராக்கின் இடிபாடுகளிலிருந்தோ
எரிக்கப்பட்ட யாழ்நூலகத்திலிருந்தோ
அல்லது
அணைக்கட்டுகளுக்குள் மூழ்கிப்போன
ஆதிநிலத்திலிருந்தோ
என் பொறுமை குலைந்து வெளிப்படுமானால்
மூடிய ஆலையின் வெளித்தொங்கும் பூட்டாக துருப்பிடித்தோ
ஹிட்லரின் சிரிப்பாகி மின்னும்
திரிசூல பளபளப்பாகவோ இருக்காது

சௌதார் குளத்தில் நீரருந்திய தாகமாக
சீன நெடும்பயணத்தில் நடந்த பாதங்களின் வலுவாக
சியாட்டில் வீதியில் கொப்பளித்த சினமாக
வியட்நாமின் வயல்வெளியிலிருந்து
விண்ணுக்கு குறிபாய்ச்சிய விழியாக
பாலஸ்தீன பதுங்குக்குழியிலிருந்து
தாயகத்துக்கு பொங்கும் கனவாக
என்னாலும் அனுமானிக்கமுடியாத ஆகப்புது வடிவாக
வெடித்துக்கிளம்பும் என் பொறுமையோடு
நேருக்குநேர் மோதும் காலத்திற்காக
காத்திருங்கள்
என் எதிரிகளே.

கருத்துகள்

இந்த வலைப்பதிவில் உள்ள பிரபலமான இடுகைகள்

சாஸ்திரம் சடங்கு சம்பிரதாயம் - ஆதவன் தீட்சண்யா

‘‘....ஒரு இந்துவின் வாழ்வின் ஒவ்வொரு கணத்தையும் மதம் கட்டுப்படுத்துகிறது. வாழ்வில் அவன் எவ்வாறு நடந்துகொள்ள வேண்டுமென்றும், செத்த பின்பு அவனது உடல் எவ்வாற கழித்துக் கட்டப்பட வேண்டுமென்றும் அவனுக்கு ஆணையிடுகிறது. சிற்றின்ப வேட்கையில் அவன் எப்படி எப்பொழுது ஈடுபட வேண்டுமென்பதையும் அது அவனுக்குக் கூறுகிறது. ஒரு குழந்தை பிறந்தவுடன் என்னென்ன சடங்குகள் செய்ய வேண்டும், குழந்தைக்கு எப்படிப் பெயரிட வேண்டும், அதன் தலையிலுள்ள முடியை எவ்வாறு சுத்திகரிக்க வேண்டும், அதற்கு முதல் ஆகாரம் எப்படிக் கொடுக்க வேண்டும் என்பனவற்றை மதம் அவனுக்கு எடுத்துரைக்கிறது. அவன் எந்தத்தொழிலில் ஈடுபட வேண்டும், எந்தப்பெண்ணை திருமணம் செய்துகொள்ள வேண்டும் என்பதையும் அது கூறுகிறது. யாருடன் உணவருந்துவது, என்ன உணவை உட்கொள்வது, எந்தெந்த காய்கள் அனுமதிக்கப்பட்டவை, எவை தவிர்க்கப்பட வேண்டியவை என்பதையும் ஒரு நாளை அவன் எவ்வாறு கழிக்க வேண்டும், எத்தனை முறை உணவருந்துவது, எத்தனை முறை தொழுவது என்பதையும் அவனுக்கு உரைக்கிறது. மதம் தழுவாத அல்லது அதனால் ஆணையிடப்படாத எந்தவொரு செயலும் இந்துவின் வாழ்வில் கிடையாது....’’ அண்ணல் அம்பேத்கரின் இவ்வ…

ஜெயமோகன், உங்களைப் போன்றவர்கள் என் பிணத்தைக்கூடப் பார்க்கக்கூடாது- விடியல் சிவா

ஜெயமோகன்,
தோழர்கள் எஸ்.வி.ராஜதுரை, வ.கீதா ஆகியோரால் எழுதப்பட்டதும்  விடியல் பதிப்பகத்தால் வெளியிடப்பட்டதுமான ‘பெரியார்:சுயமரியாதை' நூல் -முன்விலைத் திட்டத்தின் மூலம் விற்பனை செய்யப்பட்ட நூல், அன்னிய   நிதி உதவியைக் கொண்டு தயாரிக்கப்பட்டது என்று நீங்கள் உங்கள் வலைத்தளத்தில் எழுதிய அபாண்டமான பொய்க்கு வருத்தம் தெரிவித்திருக்கிறீர்கள். ஆனால்  “நான் சொன்ன கருத்து நூலாசிரியர்களைப் பற்றியது மட்டுமே தவிர பதிப்பகம் பற்றியது அல்ல” என்று கூறியுள்ளீர்கள். எனது நேர்மையை நீங்கள் சந்தேகிக்கவில்லை என்பதையும் ஒப்புக் கொண்டிருக்கிறீர்கள். மிக்க மகிழ்ச்சி.
“பெரியார்;சுயமரியாதை சமதர்மம்' பற்றிய அந்தக்கருத்து ஒரு பிழையான நினைவில் இருந்து எழுதப்பட்டது” என்று கூறுகிறீர்கள். உங்களது 'பிழையான நினவு'க்கு ஆயுள் எவ்வளவு என்று அறிந்து கொள்ள விரும்புகிறேன். ஏனெனில் இந்தக் கருத்தை கடந்த ஒருவார காலமாக தோழர் எஸ்.வி.ராஜதுரைக்கும் உங்களுக்கும் நடந்து வரும் விவாதங்களூடாக மட்டும்  நீங்கள் வைக்கவில்லை என்பதையும் நீண்டகாலமாகவே இந்தக் கருத்தைச் சொல்லி வருகிறீர்கள் என்பதையும் நீங்களே ஒப்புக் கொண்டிருக்கிறீர்கள…

வேளைக்கொரு வானூர்தியில் பிரதமர் பறந்துகொண்டிருக்க, சாமானியர்களுக்கோ அமரர் ஊர்தி கூட இல்லை - ஆதவன் தீட்சண்யா