பெரிதினும் பெரிது கேள்... - ஆதவன் தீட்சண்யா

யானையே மோதினாலும்  அதிராத

அரண்மனையின் கதவு

மரம் இரும்பு கல் மற்றும்

எதற்கும் இளகாத உணர்வினாலானது

  

அங்குலம்தோறும்

புதுப்புது  பூட்டுகளாலும் தாழ்களாலும்

அணிசெய்து வலுவேற்றப்பட்ட

அந்தப் புராதனக்கதவின் பின்னே

வதைபட்டுக்கொண்டிருக்கிறது

நம் ஒவ்வொருவரது உயிரும்

உயிரை மீட்டெடுக்கத் துடிக்கும் நம்மை

அச்சுறுத்திப் பின்வாங்கச் செய்திட

ஆயுதங்களேந்தி அணிவகுப்பதிலும்

கதவுக்கு வெகுதொலைவிலேயே நிறுத்திவிட

தடையரண்களை எழுப்புவதிலும்

வாயிற்காப்பாளர்கள்

மும்முரமாயிருக்கும் இவ்வேளையில்

நாம் ஏன்

கதவுக்குப் பதிலாக

அரண்மனையையே தகர்க்கக்கூடாது?

24.04.2017

இன்றைய நிலவரம் - ஆதவன் தீட்சண்யா

காலுக்குத் தொப்பியும் தலைக்கு செருப்பும் அணியுமாறு
இந்த நிமிடம்வரை உத்தரவு எதுவும் பிறப்பிக்கப்படவில்லை

கண்ணிருக்கும் இடத்தில் கண்ணும்
காதிருக்கும் இடத்தில் காதுமே இருந்துவிட்டுப்போகட்டுமென்று
மாட்சிமை தங்கிய அரசு
குடிமக்களை இன்றும் அனுமதித்திருக்கிறது கருணையுடன்

தொடர்ந்தும் வாய்வழியாகவே உண்பதை மாற்றுவது குறித்து
இன்றைய அமைச்சரவைக்கூட்டத்திற்குப் பிறகு அறிவிக்கப்படும்

ஒரு மாறுதலுக்காகவும் காற்றை மிச்சப்படுத்தவும்
மூக்கின் ஒரு துவாரத்தை தூர்த்து மூடும் திட்டம்
நள்ளிரவு 12 மணி முதல் அமலுக்கு வருகிறது

உலகிலேயே முதன்முறையாக
தண்டவாளத்தில் பேருந்து தார்ரோட்டில் ரயில்
துறைமுகத்தில் விமானம் விமானநிலையத்தில் கப்பல் என்று
அரசு எடுத்துவரும் ஆக்கப்பூர்வ மாற்றங்களுக்கு ஆதரவளிக்குமாறு
குடிமக்கள் எச்சரிக்கப்படுகிறார்கள்

பிரசவ ஆஸ்பத்திரியை சுடுகாட்டுக்கு மாற்றியுள்ள அரசு
நாட்டையே சுடுகாடாக மாற்றும் திட்டம் படிப்படியாக நிறைவற்றப்படும்

கோன் எவ்வாறோ குடிக்களும் அவ்வாறேயானபடியால்
அவர்களும்
எதையும் எப்போதும்
ஒரே இடத்தில் நீடித்திருக்கவிடமாட்டார்கள் என எதிர்பார்க்கப்படுகிறது.

- நன்றி: ஜூனியர் விகடன், 13.11.11