எதிர்பார்க்கும் வடிவத்தில் எதிரி இல்லை - ஆதவன் தீட்சண்யா

குறிப்பிட்ட கொள்கையை முன்வைத்து அதன்பொருட்டு ஒட்டுமொத்த சமூகத்தையும் ஈர்த்து தன்பக்கம் திரட்டிக்கொள்வதுதான் எந்தவொரு அரசியல் கட்சியின் விருப்பமாகவும் உள்ளது. ஆனால் வெளிப்படையான கொள்கையும் அதனை அடைவதற்கு துல்லியமான செயற்திட்டமும் இருந்தாலும்கூட அப்படி ஒட்டுமொத்த மக்களையும் திரட்டுவதில் கட்சிகள் பல்வேறு இடர்ப்பாடுகளை எதிர்கொள்கின்றன. எனவே, ஒட்டுமொத்தச் சமூகத்தையும் திரட்டுவதற்குப் பதிலாக, ஏற்கனவே வெவ்வேறு காரணங்களுக்காக சமூகக்குழுக்களை அணிதிரட்டியுள்ள கட்சிகளை  அடையாளம் கண்டு அவற்றை வளைத்துப் பிடித்து தமது ஆதரவுத்தளத்தை விரிவுபடுத்துவதை ஓர் உத்தியாக அரசியல் கட்சிகள் கைக்கொள்கின்றன. தேர்தல் கூட்டணிகள் இவ்வகையானவை. 

ராஷ்ட்ரீய சுயம்சேவக் சங் என்கிற ஆர்.எஸ்.எஸ் தேர்தலில் போட்டியிடும் அமைப்பல்ல. சுதந்திரம் சமத்துவம் சகோதரத்துவம் ஆகியவற்றின் எதிர்மறையான பார்ப்பனீயத்தின் கீழ் சமூகத்தை மறுகட்டுமானம் செய்யத் துடிக்கின்ற ஓர் அமைப்பாகும். அதாவது, அது சமூக நீதிக்காவும் சமத்துவத்திற்காகவுமான நெடிய போராட்டங்களினால் பார்ப்பனீயத்திற்கு ஏற்பட்டுள்ள பின்னடைவுகளைச் சரிசெய்து முன்னிலும் இறுக்கமானதாக இந்தியச் சமூகத்தைக் கட்டமைக்க விரும்புகிறது. இந்த நோக்கத்தை எட்டுவதற்கு அரசியல் அதிகாரமும் தேவை என்பதால் ஆர்.எஸ்.எஸ். முன்பு ஜனசங்கம் என்ற பெயரில் ஒரு கட்சியை நடத்தி வந்தது. பிறகு ஜனசங்கத்தை பாரதிய ஜனதா கட்சியாக்கியது. 

சுதந்திரப் போராட்டத்திலோ நாட்டின் மரியாதையை உயர்த்தும் நடவடிக்கைகளிலோ மக்களின் விருப்பார்வங்களை நிறைவேற்றுவதிலோ ஆக்கப்பூர்வமான பங்களிப்பு எதையும் செய்திராத ஆர்.எஸ்.எஸ். அழிவுப்பூர்வமானது என்றே மக்களின் நினைவில் பதிந்துள்ளது. எனவே  ஆர்.எஸ்.எஸ்.சின் கொள்கையைச் செயல்படுத்த அதிகாரம் வேண்டும் என்று வெளிப்படையாகச் சொன்னால் ஆதரவு கிடைக்காதென்பதால் இந்து என்கிற மத அடையாளத்தை முன்னிறுத்தி மக்களை அணிதிரட்டப் பார்க்கிறது பாஜக. இதன் மூலம் அது இந்துக்களல்லாத மதச் சிறுபான்மையினரை திட்டமிட்டே தனது ஆதரவுத்தளத்திற்கு வெளியே நிறுத்துகிறது. எனவே அதன் கொள்கை ஒட்டுமொத்த சமூகத்திற்குமானது அல்ல என்பதும் அது இந்துக்களை மட்டுமே திரட்ட முயற்சிக்கிறது என்பதும் வெளிப்படை. எனினும் இந்து என்கிற பெரும்பான்மை அடையாளத்துக்குள் தள்ளப்பட்டவர்கள் தமக்குள் ஒன்றுபடவியலாமல் முரண்படும் சாதியக்குழுக்களாக இருக்கின்றனர். 

இந்து என்கிற பொது அடையாளத்துக்குள் இருக்கும் உள்முரண்களைத் தீர்த்து வைப்பதற்கு பதிலாக அந்த முரண்களை அப்படியப்படியே பேணிக்கொண்டு ஒவ்வொரு குழுவுக்கும் வேண்டிய சிலவற்றை செய்துகொடுத்தோ அல்லது செய்வதாக வாக்குறுதியளித்தோ அவர்களை தனது ஆதரவாளர்களாக தனிப்பட்ட முறையில் இணைத்துக்கொள்ள பாஜக முயற்சிக்கிறது. அத்தோடும் நில்லாமல் அத்தகைய முரண்பாடுகளை முரண்பாடுகளாக கருதாமல் அவற்றை இந்துமதத்தின் தனித்துவம் என்று ஏற்கும்படியாக கூர்மைப்படுத்தவும் பாஜக முனைகிறது. இதற்காக அது அந்தந்த வட்டாரத்தின் சூழலுக்கேற்ப சாதி/ உட்சாதி/ வட்டாரம்/ தேசிய இனம் சார்ந்த பல்வேறு குழுக்களுடனும் தன்னை அடையாளப்படுத்திக் கொண்டு தனது ஆதரவுத்தளத்தை விரிவுபடுத்துகிறது. இவ்வாறு விரிவுபடும் ஆதரவுத் தளத்தை தனது வாக்குவங்கியாக மடைமாற்றிக்கொள்ளும் முயற்சியை சமூகப் பொறியியல் என்கிறது பாஜக. மக்களின் மனவோட்டங்களைப் பகுத்தாய்ந்து பெறும் தரவுகளின் அடிப்படையில் அவர்களை அணுகுவதற்குரிய சமூகப்பொறியியலை உருவாக்குகிறது பாஜக. 

குறிப்பிட்ட சமூகக்குழுவைக் குறிவைத்து தொடர்புகொள்வது, அதற்குள் ஊடுருவுவது, அக்குழுவில் உள்ளவர்களை ஈர்ப்பதற்கான முழக்கங்களை உருவாக்குவது, அவர்களின் மதிப்பிற்குரிய ஆளுமைகள், நம்பிக்கைகள், சடங்குகள், பண்டிகைகள் ஆகியவற்றை மதிப்பதாக காட்டிக்கொள்வது, அந்தக் குழு இந்துமதத்தின் தவிர்க்கமுடியாத முக்கியத்துவம் கொண்ட பகுதி என்று சித்தரிப்பது, அதன் தனித்துவமான பண்பாட்டுக் கூறுகளை உட்செரித்து பார்ப்பனியத்தன்மையுடன் இணைப்பது ஆகிய உள்ளடி வேலைகள் மூலம் இந்தச் சமூகப் பொறியியல் இயங்குகிறது. நேரடியாகவும் ஊடகங்கள் மூலமாகவும் உயிரோட்டமான தொடர்பினை உருவாக்கி அதன் மூலம் அக்குழுவில் உள்ள மக்களது கருத்துலகத்தின் மீது செல்வாக்கு செலுத்தி அவர்களது முடிவெடுக்கும் மனோநிலையை தமக்குச் சாதகமாக மாற்றியமைப்பதற்கு உகந்த சமூகப் பொறியியலை ஆர்.எஸ்.எஸ். வழிகாட்டுதலுடன் பாஜக கைக்கொள்கிறது. 

சமூகக்குழுக்களால் வழிபடப்படும் நாட்டார் தெய்வங்களை சிவன் பார்வதி விஷ்ணு லஷ்மி ஆகிய பெருந்தெய்வங்களின் அம்சங்களாக காட்டும் புனைகதைகளை உருவாக்கிப் பரப்புவது, ஒவ்வொரு சாதியக்குழுவும் வம்ச வரலாறு என நம்பும் கதையை / தோற்றக்கதையை உண்மையென அங்கீகரிப்பது அல்லது கதையை உருவாக்கிக் கொடுப்பது, கலை இலக்கியங்களையும் அறிவியல் தொழில்நுட்பக் கண்டுபிடிப்புகளையும் இந்து மதத்தின் பங்களிப்பாக சித்தரிப்பது, இந்தியாவின் நெடிய வரலாற்றுக்குப் பெருமைமிக்கப் பங்களிப்புச் செய்தமைக்காக மக்களின் நன்மதிப்பைப் பெற்ற ஆளுமைகளை தம்மவர் என உரிமை கொண்டாடுவது, சாதியாக இருப்பதைப் பெருமிதமாக கருதவைப்பது, சாதியாக இருப்பதனால் கிடைக்கும் ஆதாயங்களை இந்து மத்தின் கொடையாகவும் பாதகங்களை அன்னியர்களின் ஊடுருவல்/ தாக்கமாக காட்டுவது, சமூகத்தின் ஒருதரப்பை ஆபத்தான அன்னியர்களெனச் சித்தரித்து அவர்களை எதிர்க்க வேண்டியவர்களெனக் காட்டுவது, படிநிலையையும் பாகுபாட்டையும் இயல்பானதாக பரப்புவது, சமத்துவம் என்னும் கருத்தாக்கத்தை சாதியமைப்பைச் சிதைக்கும் ஆபத்தாக முன்னிறுத்துவது என்று பீஹார், உ.பி, ம.பி, ராஜஸ்தான், மகாராஷ்ட்ரா போன்ற வடமாநிலங்களில் கைக்கொண்டு ஓரளவு ஆதாயமீட்டிய சமூகப் பொறியியலை தமிழ்நாட்டிற்கேற்றாற் போல பாஜக பயன்படுத்த வேண்டும் என்பதே ஆர்.எஸ்.எஸ். திட்டம். 

தமிழ்ச்சமூகத்தின் பின்தங்கிய மனநிலையையும் பிற்போக்கான கண்ணோட்டத்தையும் பிரதிநிதித்துவம் செய்கின்ற சக்திகளை, அமைப்புகளை, கட்சிகளை அதனதன் சீரழிவுத்தன்மைகளோடு ஒருங்கிணைத்து தலைமை தாங்குவதன் மூலம் தமிழ்நாட்டில் பாஜகவின் ஆதரவுத்தளத்தை விரிவுபடுத்திக் கொடுப்பது ஆர்.எஸ்.எஸ்.சின் உடனடி நோக்கமாக இருக்கலாம். ஆனால் தேர்தல், வாக்கு, அரசியல் அதிகாரம் என்பவற்றுக்கும் அப்பால் பார்ப்பனீயத்திற்கு விசுவாசமானதாக மனித மனங்களைத் தகவமைப்பதே அதன் மெய்யான இலக்கு. அதன்பொருட்டு குடியிருப்போர் நலன், கல்வி, சுற்றுச்சூழல், யோகா, குழந்தை வளர்ப்பு, மகளிர் நலன், கலை இலக்கியம், பண்பாடு, விளையாட்டு, பாரம்பரியம், மரபு, தொல்லியல் ஆய்வு, ஊடகம் சார்ந்தியங்கும் அமைப்புகளில் ஊடுருவி தன்வயப்படுத்தியுள்ளது ஆர்.எஸ்.எஸ்.   

தெருச்சண்டைகள் மதக்கலவரங்களில் தெரிவது மட்டுமே ஆர்.எஸ்.எஸ். அல்ல. அது உள்ளூர் சமூகத்தில் தவிர்க்கமுடியாத வகையில் மக்களுடன் பிணைப்புகளை உருவாக்கிக் கொள்வதற்கான பொறுமையுடன் இயங்குகின்ற, நேரடியாக அரசியல் பேசாமல் நடுநிலைத் தோற்றம் காட்டுகிற பல்வேறு புதிய நிழலமைப்புகளை பெரும் முதலீட்டில் களமிறக்கியுள்ளது. வரலாற்றுச் சக்கரத்தைப் பின்னுக்கிழுக்க ஆர்.எஸ்.எஸ். முன்வைக்கும் இந்தச் சமூகப் பொறியியலை முறியடிக்க விரும்பும் சக்திகள், அதற்கேற்ற நுட்பமும் வலுவும் கொண்ட நிலைப்பாடுகளையும் செயல்பாடுகளையும் கைக்கொண்டாக வேண்டிய தருணமிது.

நன்றி: தமிழ்நாடு தீண்டாமை  ஒழிப்பு முன்னணியின் 5ஆவது மாநில மாநாட்டு மலர்

 

அதிகாரத்தைப் பற்றிய உண்மைகளைப் பேசுவோம் - ஆதவன் தீட்சண்யா

“அதிகாரத்தை நோக்கி உண்மையைப் பேசு எனக் கூறுவது இப்போது தேய்வழக்காகிப் போனது. அதிகாரத்தைப் பற்றிய உண்மைகளைப் பேசுவதே இங்கு தேவையாக இருக்கிறது” என்கிறார் ஊடகவியலாளர் பி.சாய்நாத். மக்களிடமிருந்து அதிகாரத்தைப் பெற்றுக் கொண்டவர்கள் அவ்வதிகாரத்தை மக்களுக்கு எதிராகவே ஏவும் கொடூரத்தை துணிவுடன் அம்பலப்படுத்துவதற்கான ஓர் அறைகூவல் இது. இந்த அறைகூவலுக்கு ஓர் எளிய செயல்விளக்கமாக அமைந்துவிட்டது 2022 ஜனவரி 15 அன்று ஜீ தமிழ் தொலைக்காட்சியில் வெளியான சிறார் நிகழ்ச்சியொன்று. 

ஜூனியர் சூப்பர் ஸ்டார் சீசன் 4 என்ற அந்நிகழ்ச்சித்தொடரில் பங்கெடுத்த இரண்டு சிறார்கள் இம்சை அரசன் 23ஆம் புலிகேசியையும் அவனது மங்குனி அமைச்சனையும் நினைவூட்டும் விதமான தோற்றத்தில் வந்து தமக்குள் ஓர் உரையாடலை நிகழ்த்துகின்றனர். கருப்புப்பண ஒழிப்பு, பணமதிப்பிழப்பு, ஊதாரித்தனம், பொதுத்துறை நிறுவனங்களை விற்பது என நாட்டின் நலனுக்கு விரோதமாக செயல்படும் மன்னன் அக்கெடுவழியில் மேலும் செல்லும் விருப்பத்தை வெளிப்படுத்துவதும் அதை அமைச்சன் தடுக்க முற்படுவதுமான இந்த உரையாடல் நிகழ்த்தப்படுகையில் அரங்கமே ஆரவாரித்திருக்கிறது. அந்நேரத்துப் பார்வையாளர்களும் கூட அதேயளவுக்கு நகைப்புடன் ரசித்துவிட்டு அடுத்தச் சேனலுக்கு ரிமோட்டை அழுத்தி கடந்துப் போயிருப்பார்கள். ஆனால் அப்படி நிகழாவண்ணம் தடுத்து இந்நிகழ்வை ஒட்டுமொத்த சமூகத்தின் கவனத்திற்குக் கொண்டுவந்து பெரும் பேசுபொருளாக்கிய பெருமை தமிழக பாஜக தலைவர் அண்ணாமலையையே சாரும். 

போலிஸ்துறையில் இருக்கும்போது அரசியல்வேலையும் இப்போது அரசியல்களத்தில் போலிஸ் வேலையும் செய்துவருகிற மேற்படி அண்ணாமலை, இந்த நிகழ்ச்சி பிரதமரின் மாண்பை குலைப்பதாக இருக்கிறதென்றும் அதற்காக இந்நிகழ்வில் தொடர்புடைய அனைவரும் நிபந்தனையற்ற மன்னிப்பு கேட்கவேண்டும் என்று கதற ஆரம்பித்தார். அதன் பிறகுதான் “அடடா அப்பேர்ப்பட்ட அரிய நிகழ்ச்சியை எப்படி தவறவிட்டோம் என்ற அங்கலாய்ப்புடன் தமிழ்ச் சமூகம் விழுந்தடித்துப் பார்த்து பரவலாக்கியது. நமது பன்மொழிப்பாவலர்கள் அவசரடியாக பல்வேறு மொழிகளுக்கும் மொழிமாற்றி கொண்டாட்டத்தை உலகளாவியதாக்கி விட்டார்கள். குடிமக்கள் எவ்வாறு வாழ்கிறார்கள் என்பதுதானே ஒரு பிரதமருக்கு மாண்பு. ஆனால் அறியாப்பிள்ளைகளின் ஐந்துநிமிட நிகழ்ச்சியினாலேயே பிரதமரின் மாண்புக்கு பங்கம் நேர்ந்துவிடும் என்றால் அது என்ன மாண்பு என்றெல்லாம் கேள்விகள் சுழன்றன. அதன் பிறகும் அடங்காத அண்ணாமலையும் அவரது கூட்டாளிகளும் இந்நிகழ்வு குறித்து ஜீ தமிழ் தொலைக்காட்சியிடம் விளக்கம் கேட்கும்படி ஒன்றிய தகவல் ஒளிபரப்புத்துறை அமைச்சகத்திடம் புகார் செய்தார்கள். அந்த அமைச்சகமோ பாரதிய ஜனதாவின் தகவல் ஒளிபரப்புத்துறையாக தரமிறங்கி அந்தப் புகாரின் தூண்டுதலில் ஜீ தொலைக்காட்சியிடம் விளக்கம் கேட்டு கடிதம் அனுப்பியுள்ளது. 

இந்தப் புகார் மற்றும் விளக்கம் கோரும் கடிதத்தின் சாரமும் தொனியும் அப்பட்டமான ஜனநாயகவிரோதமானவை. நிகழ்த்துனர்களாகிய சிறார்கள் மோடியின் பெயரையோ அல்லது இந்தியாவையோ நேரடியாக எங்கும் குறிப்பிடவில்லை; அப்படியே நேரடியாக குறிப்பிட்டுச் சொல்லியிருந்தாலும் அது நாட்டுநடப்பு பற்றிய விமர்சனம்தானேயன்றி அதில் அவதூறு ஏதுமில்லை. பெண் ஊடகவியலாளர்கள், சமூகச் செயற்பாட்டாளர்கள், ஆய்வாளர்கள் மீது அவதூறு செய்வதற்கு உரிமை கோரும் அண்ணாமலைகள், அரசினை விமர்சிப்பதற்கு குடிமக்களுக்குள்ள உரிமையினை மறுக்க முனைவதற்கு எதிராக ஊடகங்களிலும் ஊடகங்களுக்கு வெளியேயும் விவாதம் சூடுபிடித்தது. உடனே விமர்சனம் செய்யுங்கள், ஆனால் குழந்தைகளை வைத்து ஏன் செய்கிறீர்கள் என்று திசைதிருப்பினார்கள். குழந்தைகளை சங்கிகள் தமது கெடுதியான நோக்கங்களுக்கு பயன்படுத்தும்போது குழந்தைகளை வைத்து இப்படி விமர்சிப்பதில் என்ன தவறு என்று ஏட்டிக்குப்போட்டியாக வாதிடுவது அர்த்தமற்றது. குழந்தைகள் நடப்புண்மைகளை தம் சொந்தக்கண்  கொண்டு பார்த்து அவற்றின் மீது கருத்து சொல்லும் வல்லமையும் கூருணர்வும் கொண்டவர்கள் என்பதை நிறுவியதும்,  விளக்கம்தானே கேட்டிருக்கிறோம், நடவடிக்கையா எடுத்துவிட்டோம் என்று மழுப்புகிறார்கள். 

ஏழரையாண்டுகால மோடி ஆட்சியின் ஏழரைகளுக்கு எதிரான விமர்சனங்களை எதிர்கொள்ள முடியாத பாஜகவினர் தங்களது அரட்டல்மிரட்டல் அராஜகத்தால் மக்களின் குரலடக்கப் பார்க்கிறார்கள். ஒன்றிய இணையமைச்சராக முருகன் பொறுப்பேற்றதும் ஆறே மாதத்தில் ஊடகங்களை எங்களது கட்டுப்பாட்டிற்குள் கொண்டுவந்துவிடுவோம், நாங்கள் ஆட்சியிலிருக்கும் 17 மாநிலங்களின் போலிசை வைத்து  தமிழ்நாட்டின் மாற்றுக் கருத்தாளர்களை ஒடுக்குவோம் என்றெல்லாம் கடந்தநாட்களில் கொக்கரித்து வந்ததன் தொடர்ச்சியில் தான் அண்ணாமலை இப்போது சிறார்களிடம் மல்லுக்கு நிற்கிறார். சிறுவர்கள் தான் தனக்கு சமதையானவர்கள் என்று அவர் வேண்டுமானால் நினைத்துக்கொள்ளலாம். ஆனால் அந்தச் சிறுவர்கள் அதை ஏற்க வேண்டுமே!    

நன்றி: செம்மலர், 2022 பிப்ரவரி