முதன்மை உள்ளடக்கத்திற்குச் செல்

உங்களவனாதல் - ஆதவன் தீட்சண்யா



ந்தக் கவிதையை உங்களுக்குப் பிடிக்காது

கவிதைக்குரிய மொழியும் லட்சணங்களுமற்ற

இந்தக்கவிதையை எனக்கும்கூட பிடிக்கவில்லை

 மரபுகளும் புதுமைகளும் மனங்கிளர்த்தும் உவமைகளுமற்ற

இந்தக்கவிதையை யாருக்குத்தான் பிடிக்கும்?



கொளுத்தப்பட்ட வீடுகளின்  கருகல் நெடியும்

குலையறுத்தச் சாவுகளின் ஒப்பாரியொலியும்

பாலிச்சைக்கு பணியாதவர்க்கோர் பாடமென

உள்ளுக்குள் கொட்டிவிட்டுப் போன செருப்பாணிகள் குத்தி

சீழ்வைத்தழுகும் குறியின் வலியும்

தொடை கூட்டவியலா அப்பெண்களின் கதறலும்

கவிதைக்குள் வரக்கூடாதென்பதறியாத இந்தக்கபோதி

மாசுமருவற்ற இவ்வெள்ளைத்தாளையும்

உங்களது ரம்மியமான மாலைப்பொழுதையும்

வீணடித்துவிட்டதற்காக  வருந்துகிறேன்



பீ வழியும் கூடையுடன் உங்கம்மாவும்

பிணமெரித்த வாடையுடன் உங்கப்பனும்

அறுத்தெடுத்த மார்போடு உங்கக்காவும்

அவமானத்தில் தினம் சாகும் சுற்றமும் நடமாட

கவிதையொன்றும் சேரியல்லவென

எத்தனையோ முறை நீங்கள் எச்சரித்திருந்தும்

அத்துமீறி அவர்களை கூட்டிவந்து

உங்களால் இந்தக்கவிதை

நாலுசபைகளில் வாசிக்கப்படும் வாய்ப்பையும்

விருதுகளுக்கு பரிந்துரைக்கப்படுவதையும்

நானாகவே கெடுத்துக்கொண்டேன்



நான்தான் விவரங்கெட்டவனென்றால்

ஊருக்குப் புறத்தே ஒதுக்கிவைக்கப்பட்டிருக்கிற தாங்கள்

கவிதைக்குள்ளும் வரக்கூடாதவரென்று

அவர்களாகவே ஒதுங்கித்தொலைத்திருந்தால்

கவிதையும் இப்படி அசிங்கப்பட்டிருக்காது

வாசகராகிய நீங்களும் தீட்டாகியிருக்கமாட்டீர்கள்



108 குடம் பால்

108 குடம் தயிர்

108 குடம் நெய்

108 குடம் மாட்டு மூத்திரம்

108 குடம் சாணக்குழம்பு கலந்த புனிதஜலத்தில்

பரிகாரத் தீர்த்தமாடி நீங்கள் வரும்போது

தீட்டுப்படுத்தும் எம்முறவுகளை

கவிதைக்குள்ளிருந்து வெளியேற்றிவிட்டு காத்திருப்பேன்

உங்களுக்கு உகந்த ஒரு கவிதையை எழுதுகிறவனாய்.




24.05.14

நன்றி: உயிர் எழுத்து, ஜூன் 2014





கருத்துகள்

  1. //கொட்டிவிட்டுப் போன செருப்பாணிகள்//
    வாசிக்கும் போதே வலிக்கிறது.

    பதிலளிநீக்கு
  2. என்ன சொல்ல அருமை தோழர். கலங்கடிக்குது சொற்கள் அல்லது நிஜங்கள்.

    பதிலளிநீக்கு

கருத்துரையிடுக

இந்த வலைப்பதிவில் உள்ள பிரபலமான இடுகைகள்

சாஸ்திரம் சடங்கு சம்பிரதாயம் - ஆதவன் தீட்சண்யா

‘‘....ஒரு இந்துவின் வாழ்வின் ஒவ்வொரு கணத்தையும் மதம் கட்டுப்படுத்துகிறது. வாழ்வில் அவன் எவ்வாறு நடந்துகொள்ள வேண்டுமென்றும், செத்த பின்பு அவனது உடல் எவ்வாற கழித்துக் கட்டப்பட வேண்டுமென்றும் அவனுக்கு ஆணையிடுகிறது. சிற்றின்ப வேட்கையில் அவன் எப்படி எப்பொழுது ஈடுபட வேண்டுமென்பதையும் அது அவனுக்குக் கூறுகிறது. ஒரு குழந்தை பிறந்தவுடன் என்னென்ன சடங்குகள் செய்ய வேண்டும், குழந்தைக்கு எப்படிப் பெயரிட வேண்டும், அதன் தலையிலுள்ள முடியை எவ்வாறு சுத்திகரிக்க வேண்டும், அதற்கு முதல் ஆகாரம் எப்படிக் கொடுக்க வேண்டும் என்பனவற்றை மதம் அவனுக்கு எடுத்துரைக்கிறது. அவன் எந்தத்தொழிலில் ஈடுபட வேண்டும், எந்தப்பெண்ணை திருமணம் செய்துகொள்ள வேண்டும் என்பதையும் அது கூறுகிறது. யாருடன் உணவருந்துவது, என்ன உணவை உட்கொள்வது, எந்தெந்த காய்கள் அனுமதிக்கப்பட்டவை, எவை தவிர்க்கப்பட வேண்டியவை என்பதையும் ஒரு நாளை அவன் எவ்வாறு கழிக்க வேண்டும், எத்தனை முறை உணவருந்துவது, எத்தனை முறை தொழுவது என்பதையும் அவனுக்கு உரைக்கிறது. மதம் தழுவாத அல்லது அதனால் ஆணையிடப்படாத எந்தவொரு செயலும் இந்துவின் வாழ்வில் கிடையாது....’’ அண்ணல் அம்பேத்கரின் இவ்வ…

ஜெயமோகன், உங்களைப் போன்றவர்கள் என் பிணத்தைக்கூடப் பார்க்கக்கூடாது- விடியல் சிவா

ஜெயமோகன்,
தோழர்கள் எஸ்.வி.ராஜதுரை, வ.கீதா ஆகியோரால் எழுதப்பட்டதும்  விடியல் பதிப்பகத்தால் வெளியிடப்பட்டதுமான ‘பெரியார்:சுயமரியாதை' நூல் -முன்விலைத் திட்டத்தின் மூலம் விற்பனை செய்யப்பட்ட நூல், அன்னிய   நிதி உதவியைக் கொண்டு தயாரிக்கப்பட்டது என்று நீங்கள் உங்கள் வலைத்தளத்தில் எழுதிய அபாண்டமான பொய்க்கு வருத்தம் தெரிவித்திருக்கிறீர்கள். ஆனால்  “நான் சொன்ன கருத்து நூலாசிரியர்களைப் பற்றியது மட்டுமே தவிர பதிப்பகம் பற்றியது அல்ல” என்று கூறியுள்ளீர்கள். எனது நேர்மையை நீங்கள் சந்தேகிக்கவில்லை என்பதையும் ஒப்புக் கொண்டிருக்கிறீர்கள். மிக்க மகிழ்ச்சி.
“பெரியார்;சுயமரியாதை சமதர்மம்' பற்றிய அந்தக்கருத்து ஒரு பிழையான நினைவில் இருந்து எழுதப்பட்டது” என்று கூறுகிறீர்கள். உங்களது 'பிழையான நினவு'க்கு ஆயுள் எவ்வளவு என்று அறிந்து கொள்ள விரும்புகிறேன். ஏனெனில் இந்தக் கருத்தை கடந்த ஒருவார காலமாக தோழர் எஸ்.வி.ராஜதுரைக்கும் உங்களுக்கும் நடந்து வரும் விவாதங்களூடாக மட்டும்  நீங்கள் வைக்கவில்லை என்பதையும் நீண்டகாலமாகவே இந்தக் கருத்தைச் சொல்லி வருகிறீர்கள் என்பதையும் நீங்களே ஒப்புக் கொண்டிருக்கிறீர்கள…

வேளைக்கொரு வானூர்தியில் பிரதமர் பறந்துகொண்டிருக்க, சாமானியர்களுக்கோ அமரர் ஊர்தி கூட இல்லை - ஆதவன் தீட்சண்யா