முதன்மை உள்ளடக்கத்திற்குச் செல்

ஐம்பூதத்தான் அருள் - ஆதவன் தீட்சண்யா



1.
இரவின் சடவுகளால் சோம்பிப் புலர்ந்து
அந்தரத்தில் வீணே சுழன்றலைந்த 
அந்தச் சூரியனை
ராந்தல் கண்ணாடிபோல் சாம்பலால் துலக்கி
கதிர்களை நீவி பிரயோசனமாய் ஒளிரப் பணித்தேன்

பின்
அதன் வெம்மை நன்கு பூமியில் படும்படியாக
வாசலை துப்புரவாக கூட்டிவைத்தேன்

ஏலவே நான் சொல்லிவைத்திருந்ததன் பேரில்
கோழிகள் கூவி
எழுப்பின எல்லோரையும்

ஆனால் சற்றைக்கெல்லாம்
அறுத்தெறிந்த அன்னாசிப்பழத்துண்டைப்போல
மேலேறிச் சுழன்று போய்க்கொண்டிருந்தது சூரியன்

நட்டாற்றில் முங்கியிருந்து திடுமென வெளிப்பட்ட ஒருவன்
மந்திரங்களை முணுமுணுத்தபடி
வானோக்கி விரித்தான் கைகளை
கொஞ்சம் தாமதித்திருந்தாலும்
அவன் கைகளுக்கு சிக்கியிருப்பேனே என்று
பதறும் நெஞ்சைப் பிடித்துக்கொண்டு
மூச்சிரைக்க சடுதியாய் மேலேறிய சூரியன்
நட்சத்திரங்களையும் கோள்களையும் கிரகங்களையும்
ஒளிறெக்கைக்குள் மறைத்து பத்திரப்படுத்தியது

இப்போதுமென்ன
வசைகளை மந்திரமென முணங்கும் அவன்
சூரியனைத் தன் அக்குளிலிருந்து பிறப்பித்ததாகத்தான்
ஊரெங்கும் சொல்லித் திரிகிறான்
அறிவியலும் வரலாறும் அறியாத நீங்களோ
சூரியனை விடுத்து
அவனைத் தொழுகிறீர்.

2.
பூமியின்
ஒவ்வொரு அங்குலத்திலும்
அதனதன் உரிமைக்காரர் பெயர் பதியப்பட்டாயிற்று

மஞ்சள் நீலம் அதிபச்சையென
வண்ணம் பூசிய முட்டுக்கற்கள்
ஆக்கிரமித்தவர் பெயரை அறிவிக்கின்றன

இவ்வாறே
கடற்பரப்பும் வான்வெளியும்
அளந்து பிரிக்கப்பட்ட பிறகு
வேறு கிரகங்களுக்கு விரைகிறீர்கள்

எங்காவது இருக்கிறதா எங்கள் பெயருமென
தேடியலையும் நாங்கள்
யார் தலையில்
கால் வைக்க?

 
3.
காற்று எல்லாவிடத்திலும் நிறைந்திருக்கிறது
சாதியைப்போல
பொத்தானுக்கு அடங்கி வீசவும் உறையவும் கற்றுக்கொண்ட அது
கடவுளைப்போல வீசுகிறது பாரபட்சமாக 
நாசியைக் கருக்கும் நாற்றங்களை எம்மீது வீசிச்செல்லும் அது
எம்வாழ்வின் நறுமணங்களை வேறெங்கோ வழித்துச்செல்கிறது
மூளும் ஆத்திரத்தில்
கழுத்தைப் பிடித்து இறுக்கிவிடலாமாவெனத் தோன்றுகிறது
எல்லோரும் செத்தொழிவீர்களேயென விட்டுவைக்கிறேன்.

4.
அமீபாவை ஈன்றெடுக்கும் வலுவை
தண்ணீருக்கு ஈந்ததிலிருந்து தொடங்குகிறது
உயிர்களுக்கான எமது கொடை
ஆதியமீபாவின் ஒற்றைச்செல் பல்கிப் பெருகியபோது
அதன் ஒவ்வொன்றிலும் எங்கள் பெயரிருந்தது
ஆய்வகங்களின் மேசைகளில் நீங்கள் செய்ததெல்லாம்
உங்களது பெயர்களை ஸ்டிக்கர்களாக ஒட்டியதுதான்.
நெற்றிவேர்வை நிலத்தில் சொட்டி
நீரை பூமியில் உண்டுபண்ணிய எங்கள் வாயில்
சிறுநீரைப் பெய்யும் நுட்பம்
நீங்கள் கண்டுபிடித்த மற்றொன்று.

5.
அண்மையில் தெரிகிற ஆகாயம்
உண்மையில் தொலைவில் இருக்கிறது
மேகங்கள் சுதந்திரமாய் நகர்ந்து திரிவதைப் பார்த்தாலே
அது இன்னமும் ஊர் சேரியென
பிரிக்கப்படாததாய் இருப்பது புரிகிறதல்லவா
பூமியை முழுதாய் உங்களுக்கு தானபத்திரம் செய்தபின்
இரவோடிரவாகப் பறந்த நாங்கள்
ஆகாயத்தில் குடியேறியதற்கு அதுவும் ஒரு காரணம்
மற்றொன்று
உங்களால் கொளுத்தப்பட முடியாத கூரை அது
ஆயினும்
நீங்கள் ராக்கெட்டுகளை அனுப்புவதன் பின்னேயுள்ள
சூழ்ச்சிகள் நாங்கள் அறியாததல்ல
நாங்கள் வசிக்கும் ஆகாயம்
ஒருபோதும் உங்களுக்கு தரைவிரிப்பாக மாறாது.
 
 நன்றி: செம்மலர், அக்டோபர் 2015
















கருத்துகள்

இந்த வலைப்பதிவில் உள்ள பிரபலமான இடுகைகள்

சாஸ்திரம் சடங்கு சம்பிரதாயம் - ஆதவன் தீட்சண்யா

‘‘....ஒரு இந்துவின் வாழ்வின் ஒவ்வொரு கணத்தையும் மதம் கட்டுப்படுத்துகிறது. வாழ்வில் அவன் எவ்வாறு நடந்துகொள்ள வேண்டுமென்றும், செத்த பின்பு அவனது உடல் எவ்வாற கழித்துக் கட்டப்பட வேண்டுமென்றும் அவனுக்கு ஆணையிடுகிறது. சிற்றின்ப வேட்கையில் அவன் எப்படி எப்பொழுது ஈடுபட வேண்டுமென்பதையும் அது அவனுக்குக் கூறுகிறது. ஒரு குழந்தை பிறந்தவுடன் என்னென்ன சடங்குகள் செய்ய வேண்டும், குழந்தைக்கு எப்படிப் பெயரிட வேண்டும், அதன் தலையிலுள்ள முடியை எவ்வாறு சுத்திகரிக்க வேண்டும், அதற்கு முதல் ஆகாரம் எப்படிக் கொடுக்க வேண்டும் என்பனவற்றை மதம் அவனுக்கு எடுத்துரைக்கிறது. அவன் எந்தத்தொழிலில் ஈடுபட வேண்டும், எந்தப்பெண்ணை திருமணம் செய்துகொள்ள வேண்டும் என்பதையும் அது கூறுகிறது. யாருடன் உணவருந்துவது, என்ன உணவை உட்கொள்வது, எந்தெந்த காய்கள் அனுமதிக்கப்பட்டவை, எவை தவிர்க்கப்பட வேண்டியவை என்பதையும் ஒரு நாளை அவன் எவ்வாறு கழிக்க வேண்டும், எத்தனை முறை உணவருந்துவது, எத்தனை முறை தொழுவது என்பதையும் அவனுக்கு உரைக்கிறது. மதம் தழுவாத அல்லது அதனால் ஆணையிடப்படாத எந்தவொரு செயலும் இந்துவின் வாழ்வில் கிடையாது....’’ அண்ணல் அம்பேத்கரின் இவ்வ…

ஜெயமோகன், உங்களைப் போன்றவர்கள் என் பிணத்தைக்கூடப் பார்க்கக்கூடாது- விடியல் சிவா

ஜெயமோகன்,
தோழர்கள் எஸ்.வி.ராஜதுரை, வ.கீதா ஆகியோரால் எழுதப்பட்டதும்  விடியல் பதிப்பகத்தால் வெளியிடப்பட்டதுமான ‘பெரியார்:சுயமரியாதை' நூல் -முன்விலைத் திட்டத்தின் மூலம் விற்பனை செய்யப்பட்ட நூல், அன்னிய   நிதி உதவியைக் கொண்டு தயாரிக்கப்பட்டது என்று நீங்கள் உங்கள் வலைத்தளத்தில் எழுதிய அபாண்டமான பொய்க்கு வருத்தம் தெரிவித்திருக்கிறீர்கள். ஆனால்  “நான் சொன்ன கருத்து நூலாசிரியர்களைப் பற்றியது மட்டுமே தவிர பதிப்பகம் பற்றியது அல்ல” என்று கூறியுள்ளீர்கள். எனது நேர்மையை நீங்கள் சந்தேகிக்கவில்லை என்பதையும் ஒப்புக் கொண்டிருக்கிறீர்கள். மிக்க மகிழ்ச்சி.
“பெரியார்;சுயமரியாதை சமதர்மம்' பற்றிய அந்தக்கருத்து ஒரு பிழையான நினைவில் இருந்து எழுதப்பட்டது” என்று கூறுகிறீர்கள். உங்களது 'பிழையான நினவு'க்கு ஆயுள் எவ்வளவு என்று அறிந்து கொள்ள விரும்புகிறேன். ஏனெனில் இந்தக் கருத்தை கடந்த ஒருவார காலமாக தோழர் எஸ்.வி.ராஜதுரைக்கும் உங்களுக்கும் நடந்து வரும் விவாதங்களூடாக மட்டும்  நீங்கள் வைக்கவில்லை என்பதையும் நீண்டகாலமாகவே இந்தக் கருத்தைச் சொல்லி வருகிறீர்கள் என்பதையும் நீங்களே ஒப்புக் கொண்டிருக்கிறீர்கள…

வேளைக்கொரு வானூர்தியில் பிரதமர் பறந்துகொண்டிருக்க, சாமானியர்களுக்கோ அமரர் ஊர்தி கூட இல்லை - ஆதவன் தீட்சண்யா