முதன்மை உள்ளடக்கத்திற்குச் செல்

முடிந்துபோன சிகரெட்டுகளும் மிச்சமிருக்கும் விவாதங்களும் - ஆதவன் தீட்சண்யா

காங்கிரசின் ஜெயராம் ரமேசுக்கும் ராஸ்ட்ரீய சர்வநாச சங்கத்தின் மோடிக்கும் இப்போதைக்கு பிடித்த ஒரே கவிதை இதுவாகத்தான் இருக்கும் என்பதால் காலப்பொருத்தம் கருதி இங்கு மறுவெளியீடு செய்யப்படுகிறது.

முதலில்
கழிப்பிடம் என்றதும்
ஸெப்டிக் டேங்க்கை விழுங்கியதான
முகச்சுளிப்பின்றி சமனிலை காக்கவும்

பின்
கழிப்பறைகளை
மலஜலம் தொடர்பானதென்றும்
பீடி சிகரெட் அரக்கிய வடுவேறி
பினாயில் ஆசிட் மூத்திர உப்பில்
அரிபட்டச் சுவரும் பெயர்ந்த தாழுடனும்
அடிபாகம் வெற்றிலைக் காவியேறிய
சச்சதுர அறை என்பதுமான
கற்பிதங்களை விட்டொழிப்பது நல்லது

நாராச வசவில் அரண்டெழுந்தும்
பீளையோரம் தொக்கும் கனா
பரிமாறவும் படிக்கவும் ஏலாது
மாரோரம் நையும் காதல் கடிதம்
மங்கலில் புரளும் பிடிபடாக் கவிதை
தொடையிடுக்கு நமைச்சல்
ஜட்டிக் கிழிசல்
கடவுச்சீட்டின்றி பயணம் போக
இன்னும்
பகிரவியலாத காரியம் பலதுக்கும்
நாடோடி மனம் தங்கும் கூடாரமாயும்
காலம் நேர்ந்துவிட்டதாக எஞ்சியிருப்பது
கழிப்பிடம் மட்டுமே

அவர்கள் கச்கூசுக்கு இவர்களும்
இவர்களுடையதற்கு அவர்களும்
எப்போதாவது வருவரென நம்பி
கரித்துண்டு பச்சிலைகளால்
முகவரி தொலைபேசியிலக்கம் சங்கேதக்குறி
கேள்வி பதில் உடன்படுதல் சார்ந்த
ஓவியம் கவிதை செய்திகள்
உறைந்தும் உயிர்த்தும் அங்கே
ஒடுக்கப்பட்ட இலக்கியத்தின் வீர்யத்தோடு

நீங்களோ
பால் இன வர்க்க பேதங்களை
கக்கூஸ்வரை நீட்டித்து
வாசித்தறியும் நல்வாய்ப்பை மறுக்கிறீர்
(இருந்தும் அரவாணிகளுக்கு தனித்தறிவதில்
தோல்வியுற்றதை மறைக்கிறீர்)

ஒன்றும் குடிமுழுகிப் போகாது (போனாலும் போகட்டும்)
உளுத்த பண்பாட்டுக் கதவுகளை
கொஞ்சம் அகட்டி வையுங்கள்
காற்றைப்போல்
எல்லோரும் எல்லாவிடமும்
சென்றுவரத் தேவையிருக்கிறது

மோட்சவீடு பற்றி முழங்கும் மதங்கள்
மோட்சக் கழிப்பிடம் குறித்து மூச்சுவிடுவதேயில்லை
கடவுள் / சாத்தான் ஆசீர்வதிப்பில்
இப்பிறவியிலேயே எமக்கு கழிப்பிடம் கிடைக்க
தியான மண்டபங்களும் தேவாலயங்களும்
அவ்வாறே மாறுவதாகுக

காவல் நிலையம் நீதிமன்றம்
சிறைச்சாலை ராணுவக்கேந்திரம்
தொழிற்கூடம் தூதரகம்
அரசாங்க அலுவலகம் அணுஉலைகளோடு
மூளையைக் கருக்கும் கலாசாலைகளையும்
தனிமை காத்து நிற்கும் கழிப்பிடங்களாக்கவும்
கட்டணக்கழிப்பிடங்களில்
கிரடிட் கார்டுகளை ஏற்கவும்

உணவுக்கூடங்கள் எந்தளவிற்கு வெளிப்படையோ
அந்தளவிற்கு
கழிப்பிடங்கள் அந்தரங்கமானவையென்றும்
அரசியல்சட்டத் திருத்தம் செய்ய
நடப்புக் கூட்டத்தொடரிலாவது
மசோதா கொண்டு வந்தாகணு...

என்னது,
இதெல்லாமா கவிதை என்கிறீர்களா?

சரி,
அதையும் விவாதிப்போம்
யாரிடத்தில் சிகரெட் மிச்சமிருக்கு...?










































































கருத்துகள்

இந்த வலைப்பதிவில் உள்ள பிரபலமான இடுகைகள்

சாஸ்திரம் சடங்கு சம்பிரதாயம் - ஆதவன் தீட்சண்யா

‘‘....ஒரு இந்துவின் வாழ்வின் ஒவ்வொரு கணத்தையும் மதம் கட்டுப்படுத்துகிறது. வாழ்வில் அவன் எவ்வாறு நடந்துகொள்ள வேண்டுமென்றும், செத்த பின்பு அவனது உடல் எவ்வாற கழித்துக் கட்டப்பட வேண்டுமென்றும் அவனுக்கு ஆணையிடுகிறது. சிற்றின்ப வேட்கையில் அவன் எப்படி எப்பொழுது ஈடுபட வேண்டுமென்பதையும் அது அவனுக்குக் கூறுகிறது. ஒரு குழந்தை பிறந்தவுடன் என்னென்ன சடங்குகள் செய்ய வேண்டும், குழந்தைக்கு எப்படிப் பெயரிட வேண்டும், அதன் தலையிலுள்ள முடியை எவ்வாறு சுத்திகரிக்க வேண்டும், அதற்கு முதல் ஆகாரம் எப்படிக் கொடுக்க வேண்டும் என்பனவற்றை மதம் அவனுக்கு எடுத்துரைக்கிறது. அவன் எந்தத்தொழிலில் ஈடுபட வேண்டும், எந்தப்பெண்ணை திருமணம் செய்துகொள்ள வேண்டும் என்பதையும் அது கூறுகிறது. யாருடன் உணவருந்துவது, என்ன உணவை உட்கொள்வது, எந்தெந்த காய்கள் அனுமதிக்கப்பட்டவை, எவை தவிர்க்கப்பட வேண்டியவை என்பதையும் ஒரு நாளை அவன் எவ்வாறு கழிக்க வேண்டும், எத்தனை முறை உணவருந்துவது, எத்தனை முறை தொழுவது என்பதையும் அவனுக்கு உரைக்கிறது. மதம் தழுவாத அல்லது அதனால் ஆணையிடப்படாத எந்தவொரு செயலும் இந்துவின் வாழ்வில் கிடையாது....’’ அண்ணல் அம்பேத்கரின் இவ்வ…

ஜெயமோகன், உங்களைப் போன்றவர்கள் என் பிணத்தைக்கூடப் பார்க்கக்கூடாது- விடியல் சிவா

ஜெயமோகன்,
தோழர்கள் எஸ்.வி.ராஜதுரை, வ.கீதா ஆகியோரால் எழுதப்பட்டதும்  விடியல் பதிப்பகத்தால் வெளியிடப்பட்டதுமான ‘பெரியார்:சுயமரியாதை' நூல் -முன்விலைத் திட்டத்தின் மூலம் விற்பனை செய்யப்பட்ட நூல், அன்னிய   நிதி உதவியைக் கொண்டு தயாரிக்கப்பட்டது என்று நீங்கள் உங்கள் வலைத்தளத்தில் எழுதிய அபாண்டமான பொய்க்கு வருத்தம் தெரிவித்திருக்கிறீர்கள். ஆனால்  “நான் சொன்ன கருத்து நூலாசிரியர்களைப் பற்றியது மட்டுமே தவிர பதிப்பகம் பற்றியது அல்ல” என்று கூறியுள்ளீர்கள். எனது நேர்மையை நீங்கள் சந்தேகிக்கவில்லை என்பதையும் ஒப்புக் கொண்டிருக்கிறீர்கள். மிக்க மகிழ்ச்சி.
“பெரியார்;சுயமரியாதை சமதர்மம்' பற்றிய அந்தக்கருத்து ஒரு பிழையான நினைவில் இருந்து எழுதப்பட்டது” என்று கூறுகிறீர்கள். உங்களது 'பிழையான நினவு'க்கு ஆயுள் எவ்வளவு என்று அறிந்து கொள்ள விரும்புகிறேன். ஏனெனில் இந்தக் கருத்தை கடந்த ஒருவார காலமாக தோழர் எஸ்.வி.ராஜதுரைக்கும் உங்களுக்கும் நடந்து வரும் விவாதங்களூடாக மட்டும்  நீங்கள் வைக்கவில்லை என்பதையும் நீண்டகாலமாகவே இந்தக் கருத்தைச் சொல்லி வருகிறீர்கள் என்பதையும் நீங்களே ஒப்புக் கொண்டிருக்கிறீர்கள…

வேளைக்கொரு வானூர்தியில் பிரதமர் பறந்துகொண்டிருக்க, சாமானியர்களுக்கோ அமரர் ஊர்தி கூட இல்லை - ஆதவன் தீட்சண்யா